Filipino: Wika ng Saliksik

Una sa lahat ano nga ba ang wika? At ano ang saliksik? Bakit nai-uugnay ang wika sa saliksik? Ang wika ay isa sa napakahalagang aspeto upang maging maunlad ang isang bansa at ito ang siyang sumisimbolo sa ating pagkakakilanlan. Ang wika ay hindi simple tulad ng iniisip ng iba bagkus ito ay komplikado rin kapag wala kang sapat na karunungan patungkol dito kung kaya'y kailangan din nating magsaliksik tungkol dito upang maging dalubhasa at mabigyan ng hustisya ang paggamit nito.

Napakahalaga ang Wikang Filipino sapagkat ito ang sumisimbolo sa ating pagkatao at sa ating kultura. Ito ang nagsisilbing tulay at sinturon upang magkabuklod-buklod tayong mamamayan ng ating bansa. Hindi tayo makakatuklas at makakagamit ng ibang wika hangga't hindi natin tatanggapin ang sarili nating wika. Ang wika ang pinakamabisang paraan upang maipabatid ang mga kaisipan at mapanatili ang kasaysayan at mga tala ng mga sinaunang Pilipino. Napakahalaga ng wikang ito sapagkat ito ang pangunahing instrumento nating Pilipino na maipahayag ang ating damdamin, saloobin, kaisipan, opinyon at iba pa. Wika ang nagsisilbing kaparaanan upang maging isang ganap na tao ang isang tao at maging isang ganap na bansa ang isang bansa.

Gamitin natin ang Wikang Filipino at ipakita sa buong mundo na tayo ang taas noo'ng pinagsisigawan na tayo ay mamamayan ng bansang Pilipinas. Ito ang sumisimbolo sa ating kalayaan sa mga mapang-aping dayuhan na sumakop at umalipin sa ating bansa. Dapat huwag ikahiya ang wikang naging instrumento sa pagkakaroon ng magandang edukasyon at mabisang komunikasyon. Wikang sumisimbolo sa ating pagkatao at pagka-Pilipino. Wikang nagpaunlad sa ating ekonomiya at bansa. Wikang pag-aari natin. Ang wikang pambansa. Ito ang Wikang Filipino.